Pas pranisë së përsëritur të dronëve në disa aeroporte, Danimarka nuk ka ndërmend të kërkojë konsultime me aleatët e NATO-s sipas Nenit 4 të traktatit të NATO-s.
”Qeveria nuk ka plane për të aktivizuar këtë nen”, tha sot ministri i Jashtëm danez, Lars Lokke Rasmussen, pas një takimi të komisionit parlamentar të Punëve të Jashtme në Kopenhagë, sipas agjencisë daneze të lajmeve, Ritzau.
Lokke tha se megjithatë, qeveria ishte në kontakte me aleatët e saj të NATO-s. Neni 4 parashikon konsultime midis shteteve të aleancës nëse një shtet i NATO-s ndihet i kërcënuar nga jashtë.
Ai u aktivizua së fundmi nga Polonia pas ndërhyrjes së disa dronëve dhe Estonia pas shkeljeve të hapësirës ajrore nga avionët luftarakë rusë.
Ministri i Mbrojtjes i Danimarkës, Troels Lund Poulsen tha të enjten se qeveria po shqyrtonte gjithashtu këtë hap. Danimarka ka qenë në gatishmëri për dronë për ditë të tëra. Prania e disa dronëve të mëdhenj të hënën në mbrëmje çoi në mbylljen e plotë të aeroportit të Kopenhagës për disa orë.
Të mërkurën në mbrëmje, dronët u shfaqën përsëri në errësirë mbi aeroportet e tjera në perëndim, gjë që çoi në mbylljen e hapësirës ajrore mbi aeroportin e Aalborgut. Ende nuk është e qartë se kush qëndron pas incidenteve. Qeveria daneze po e konsideron atë një “sulm hibrid”.
Burimi: botasot.info
