Vitet kalojnë, por themeli i shtetit të Kosovës mbetet sakrifica e djemve dhe vajzave të Ushtrisë Çlirimtare të Kosovës. Kështu ka theksuar Ramush Haradinaj, kreu i AAK-së dhe ish-komandant i Zonës Operative të Dukagjinit të UÇK-së, gjatë një takimi me disa bashkëluftëtarë nga Brigada 138.
Haradinaj priti Zekri Agushin, Shpëtim Agushollin dhe Xhevdet Ahmetin, duke vënë në dukje se, edhe pse Shpëtimi dhe Zekriu vazhdojnë jetën me plagët e luftës, krenaria e tyre mbetet e njëjtë si gjatë kohës së betejave.
Në nderim të sakrificës për liri dhe kontributit për çështjen kombëtare, Haradinaj ndau medaljen “Me Besim në Zot, Atdhe e Shtet” për Zekri Agushin, Xhevdet Ahmetin, Emin Latin – kryetar i OVL-së në Skenderaj, si dhe post mortem për Jetullah Gashin dhe Selman Kajtazin.
“Lum ata që, kur atdheu kishte nevojë, dhanë provimin më të madh – sakrificën për liri. Nderim e mirënjohje për shërbimin ndaj atdheut”, shkruan Haradinaj në mesazhin e tij.
Burimi: botasot.info
