Kandidati i koalicionit VLEN për kryetar të Komunës së Bërvenicës, Haqim Ramadani, ka deklaruar se mungesa e shërbimit zjarrfikës në komunë është një problem i kahershëm dhe jetik, i cili ka shkaktuar dëme të konsiderueshme materiale për banorët.
“Mungesa e këtij shërbimi është ndjerë gjatë viteve dhe fatkeqësisht ka shkaktuar dëme materiale në shumë familje, përfshirë edhe veturën time”, ka theksuar Ramadani.
Ai është zotuar se, nëse fiton mandatin, do të angazhohet institucionalisht për themelimin e një njësie rajonale të zjarrfikësve me lokacion në fshatin Radiovc, si qendër strategjike për t’u ofruar shërbime të barabarta të gjitha fshatrave përreth.
Si masë të menjëhershme, Ramadani ka paralajmëruar sigurimin e një automjeti për shuarjen e zjarreve, i cili do të vihet në dispozicion të fshatrave të komunës dhe do të mund të shfrytëzohet edhe për pastrimin e rrugëve.
“Siguria dhe mirëqenia e qytetarëve tanë duhet të jenë gjithmonë prioriteti kryesor i Komunës së Bërvenicës”, ka përfunduar ai.
Burimi: lajme24.mk
