”Punë ka, nuk duan të punojnë”/ Rama takon të rinjtë, përfitues të programit të punësimit

Kryeministri Edi Rama takoi këtë të premte të rinj përfitues nga programet e punësimit, teksa tha se Shqipëria renditet e para në rajon për këtë shërbim.

Më tej ai theksoi se punë ka, por nuk duan të punojnë, teksa shtoi se çdo muaj ka rreth 5500 vende pune.

Punë ka, por nuk duan të punojnë.

Kryeministri Edi Rama u ndal këtë të premte në një takim me të rinjtë, përfitues të Programeve të Nxitjes së Punësimit ku u diskutua mbi përfitimet nga programet e qeverisë mbi punësimin.

Numri një i qeverisë theksoi se vendi ynë mban vendin e parë në rajon për shërbimin e punësimit.

”Shqipëria sipas OECD, që është një burim shumë serioz të dhënash dhe vëzhgimesh mbi vendet, është vendi që zë vendin e parë në rajon për shërbimet e punësimit dhe kjo është diçka shumë pozitive sepse flet qartë, që puna që kemi bërë në gjithë këto vite për të ndërtuar një skemë shërbimesh punësimi, na ka dhënë një rezultat inkurajues”.

Lidhur me këtë Rama publikoi edhe shifra.

”Vetëm në 5 vitet e fundit, 42 mijë të reja dhe të rinj, janë punësuar përmes zyrave tona të punës dhe përmes këtyre shërbimeve. Është një numër jo i vogël dhe në këtë shifër, 7500 janë individë që kanë përfituar pikërisht nga programet dhe sot janë në punë”.

Kryeministri i qëndroi shprehjes së tij se punë ka por nuk ka profesionistë.

”Ata që thonë s’ka punë, janë ata që nuk duan punë, pikë, sepse vetëm në portal janë 5500 vende pune mesatarisht çdo muaj të të gjitha kategorive, çdo gjë”.

Sipas kreut të qeverisë, suksesi vjen për shkak të rëndësisë që i është dhënë rinisë me programet në mbështetje të tyre.