Me thirrjet “Drejtësi, Edi Rama o hajdut, Edi Rama o frikacak dhe dorëheqje”, protestuesit u mblodhën para kryeministrisë për të kërkuar dorëheqjen e kreut të qeverisë.
Gjatë fjalës së tij në protestë, kreu i “Shqipëria Bëhet”, Adriatik Lapaj deklaroi se Shqipëria ndodhet përballë një përplasjeje mes së mirës dhe së keqes, duke bërë thirrje për bashkimin e brezit të ri dhe të gjithë qytetarëve në çdo cep të vendit për rrëzimin e qeverisë Rama.
“Është koha që brezi i ri të bashkohet në çdo cep të Shqipërisë, është koha që fermerët të dalin rrugëve për mundin që ua mori lumi dhe lekët që nuk ua dha Edi Rama. Është koha e një nisjeje të madhe të së mirës ndaj së keqes. Ka vetëm dy palë banditë që na kanë marrë peng dhe populli. Bashkohuni”, apeloi Lapaj në protestë.
Ai kërkoi që fermerët dhe familjarët e të sëmurëve me kancer të dalin të protestojnë kundër qeverisë.
“Kjo thirrje sot është për të gjithë ata që të sëmurë me kancer që nuk gjejnë ilaçe e për ata njerëz që vuajnë nga ky regjim i hajdutëve”.
Lapaj u shpreh se nuk trembet nga kallëzimet penale apo arrestimet, duke theksuar se ka marrë një vendim pa kthim pas.
“Këta mendojnë se do më presin me kallëzime penale e arrestime. I pres në çdo kohë. Ta dinë mirë se nuk më trembin se kanë përballë një njeri që e ka marrë vendimin e jetës dhe nuk ka kthim pas. Dorëheqje, dorëheqje. Duartrokitje të madhe për funksionarët e drejtësisë që po përballen me këtë kancer malinj”, theksoi Lapaj.
Nga sheshi përballë kryeministrisë Lapaj i dërgoi edhe një mesazh kryeministrit: “I them Ramës nga ky shesh dhe këtë ia them në emër të tim ati që për çdo gjë e nismë që merr ndaj meje, je në konflikt me familjen Lapaj drejtpërdrejt”.
Ai i bëri thirrje diasporës për të çliruar mëmëdheun e koha për të ndërtuar atdheun.
Burimi: opinion.al
