Projekti për instalimin e paneleve diellore, banorët e fshatit Qinam në Kolonjë protestë: Mbrojtja e kullotave, e vetmja mënyrë për të ruajtur ekonominë tonë

Banorët e fshatit Qinam në bashkinë e Kolonjës janë ngritur në protestë këtë të shtunë kundër projektit për instalimin e paneleve diellore në zonat e kullotave.

Gjatë protestës, banorët u shprehën se megjithëse bashkia ka zhvilluar disa takime informuese, vendimet e marra deri tani nuk reflektojnë aspak shqetësimet e tyre.

Ata theksuan se ndihen të përjashtuar nga procesi dhe të pambrojtur nga institucionet.

Banorët kujtojnë se kullotat dhe arat që pritet të zëvendësohen me panele janë të ndara prej brezash mes familjeve të fshatit, dhe se aty kullosin deri në 4000 krerë bagëti, përfshirë 600 lopë.

Sipas tyre, heqja e këtyre sipërfaqeve do të paralizonte të gjithë ciklin bujqësor e blegtoral të zonës.

Një prej fermerëve u shpreh se vendosja e paneleve diellore mund t’i largojë përfundimisht edhe familjet e fundit që mbështeten te blegtoria për të siguruar jetesën.

Banorët i bëjnë thirrje institucioneve për ndërhyrje urgjente, duke u shprehur se mbrojtja e kullotave është e vetmja mënyrë për të ruajtur ekonominë e fshatit.