Profesorë e studentë të UP-së vizitojnë Ambasadën e Kosovës në Jerusalem

Ambasada e Republikës së Kosovës në Jerusalem ka pritur sot një grup profesorësh dhe studentësh nga Universiteti i Prishtinës, të cilët po qëndrojnë në Izrael në kuadër të konferencës ndërkombëtare “AI Transforming Education: A New Era of Learning”, të organizuar nga Arab Academic College in Haifa, Universiteti i Prishtinës dhe Aqaba University of Technology.

Bëhet e ditur se gjatë takimit në ambasadë u zhvilluan diskutime për mundësitë e zgjerimit të bashkëpunimit akademik ndërmjet institucioneve të Kosovës dhe Izraelit, me theks të veçantë në rolin e inteligjencës artificiale në transformimin e arsimit modern.

Ambasada e Republikës së Kosovës në Izrael, deklaron se vlerësoi lartë pjesëmarrjen e delegacionit akademik nga Prishtina dhe theksoi përkushtimin për të mbështetur nisma që forcojnë lidhjet arsimore, shkencore dhe kulturore mes dy vendeve.

Në fund të takimit, u shpreh vullneti i ndërsjellë për vazhdimin e shkëmbimeve akademike dhe zhvillimin e projekteve të përbashkëta që kontribuojnë në përmirësimin e cilësisë së arsimit dhe inovacionit.