Pogradeci pritet të përfshihet sezonin e ardhshëm turistik në guidat e operatorëve turistikë vendas dhe të huaj, me synimin për të rritur numrin e vizitorëve të huaj dhe për të shtuar netët e qëndrimit në këtë qytet.

Në një takim të zhvilluar në Pogradec me operatorët turistikë të Unionit Turistik Shqiptar, u theksua nevoja që turistët e huaj të mos e konsiderojnë më Pogradecin si destinacion tranzit. Operatorët turistikë kërkuan që në paketat turistike të përfshihen netë qëndrimi, duke shfrytëzuar potencialin natyror, kulturor dhe mikpritjen karakteristike të zonës.

Afërsia me Aeroportin Ndërkombëtar të Ohrit krijon një avantazh të rëndësishëm logjistik, i cili do të shfrytëzohet për organizimin e paketave të përbashkëta ndërkufitare, duke përfshirë edhe Pogradecin si destinacion të qëndrueshëm për turistët që zbarkojnë në Ohër.

Kryetari i Unionit Turistik Shqiptar bëri të ditur se në Pogradec do të ngrihet një degë e posaçme e këtij unioni, e cila do të fokusohet në zhvillimin e paketave turistike dy dhe tre ditore. Infrastruktura rrugore e përmirësuar tashmë e bën qytetin më të aksesueshëm, duke hapur mundësi të reja për turizmin e organizuar.

Nga ana tjetër, bashkëpunimi me kompani turistike nga Polonia dhe Çekia pritet të sjellë një fluks të ri turistësh, të cilët zakonisht qëndrojnë në Ohër, por në të ardhmen do të përfshijnë edhe Pogradecin në itineraret e tyre.

Për periudhën janar-gusht 2025, në hotelet e Pogradecit janë akomoduar 95.528 turistë, nga të cilët 18.314 ishin të huaj dhe 77.214 turistë vendas.

Burimi: botasot.info