PlusInfo.mk: “E di kush të ndihmoi të ikësh dhe kush loboi që të të kthejnë, ndihmo tani.” A janë dërguar mesazhe me këtë përmbajtje nga një person i BDI-së në një numër telefoni hungarez?

33

Shkup, 28 gusht – Burime brenda partive spekulojnë se BDI, në panik nga mundësia e humbjes së Bujar Osmanit në Çair, po kërkon zgjidhje madje edhe në Budapesht, shkruan portali plusinfo.

Në koalicionin VLEN kanë marrë konfirmim se disa javë më parë ka pasur komunikim nën ethe të panikut mes BDI-së dhe VMRO-DPMNE-së lidhur me kandidaturën e Bujar Osmanit për kryetar të komunës së Çairit, bëjnë të ditur burime partiake për “Plusinfo”.

Sipas të njëjtave burime, kreu i BDI-së, Ali Ahmeti, para disa javësh ka dërguar emisarë te lideri i VMRO-DPMNE-së, Hristijan Mickoski, për të pyetur nëse kandidimi i Osmanit – me rrezik të madh për të humbur dhe kështu të shënonte fundin e karrierës së tij politike – mund të merrej si një sinjal se BDI është e gatshme për reforma të brendshme pas zgjedhjeve lokale.

Burime të “Plusinfo” thonë se përgjigjja negative ndaj këtij propozimi i është mbajtur e fshehur Bujar Osmanit, së bashku me të gjitha arsyetimet. Në selinë e BDI-së kanë pasur frikë se Osmani mund të fitojë imazhin e humbësit ose edhe të tërhiqet para afatit për dorëzimin e kandidaturave të përcaktuar nga KSHZ.

Ndërkohë, spekulohet se Osmani në rrethe private ka pranuar se ka bërë një vlerësim të gabuar me kandidimin në Çair, sidomos pasi në terren është bindur se votuesit nuk janë të predispozuar as për të dhe as për BDI-në në përgjithësi.

Në këtë situatë, qendra e BDI-së ka kaluar në planin B. Thuhet se dikush nga shtabi i Osmanit ka dërguar SMS në një numër hungarez me përmbajtjen:

“Mos harro kush të kaloi në Shqipëri, ndihmoje Bujarin, e di sa dëshironte të të kthente në Maqedoni kur ishte ministër i Jashtëm”!

Tani pritet që Osmani dhe BDI të dalin me koment për këto zëra, sidomos për të ashtuquajturën linjë Reçicë e Vogël – Budapesht.