Situata në segmentin rrugor te Arrat e Gurrës është përkeqësuar ndjeshëm gjatë orëve të fundit për shkak të rrëshqitjes së tokës dhe fundosjes së urës, duke rritur rrezikun për çdo lloj qarkullimi.
Rreth orës 22:00 autoritetet ndaluan fillimisht lëvizjen e automjeteve dhe më pas edhe qarkullimin e këmbësorëve, si dhe të mjeteve të emergjencës, zjarrfikëse, polici e ambulanca, për shkak të rrezikut të lartë dhe pamundësisë për të identifikuar zonat e dëmtuara në errësirë.
Shërbimet emergjente po devijohen përmes rrugës alternative nga fshatrat Spathar dhe Dardhë. Ndërkohë, po punohet gjatë natës për hapjen e një bypass-i të përkohshëm në segmentin e dëmtuar të rrugës kombëtare që lidh Librazhdin me Prrenjasin, me synim rikthimin e qarkullimit.
Zona mbetet e izoluar dhe nën monitorim të vazhdueshëm, ndërsa rreziku i shembjes së plotë të strukturës konsiderohet i lartë.
Burimi: botasot.info
