Pas gati një viti në fshehje, fituesja venezueliane e çmimit Nobel për Paqe përshëndet turmat në Oslo

Liderja më e njohur e opozitës venezueliane, fituesja e çmimit Nobel për Paqe, María Corina Machado, ka bërë një paraqitje dramatike në Norvegji pasi u largua fshehurazi nga atdheu i saj autoritar me anije, shkruan The Guardian.

Politikanja dhe aktivistja pro-demokracisë doli në ballkonin e hotelit ikonik Grand në Oslo pak para orës 02:30 të mëngjesit me kohën lokale, pasi kishte kaluar 11 muaj të fshehur në kryeqytetin e Venezuelës, Caracas.

Dhjetëra mbështetës brohoritën “Trimëresha!” dhe “Liri!” para hotelit dhe kënduan himnin kombëtar venezuelian ndërsa ajo u shfaq. “Lavdi kombit trim që e shporri zgjedhën!” thirrnin ata. Ishte paraqitja e saj e parë publike pas gati një viti, pasi ishte detyruar të fshihej nga diktatori i vendit, Nicolás Maduro, pasi ai u akuzua se kishte vjedhur zgjedhjet presidenciale të korrikut 2024.

Pak minuta pasi doli në ballkonin jashtë suitës së njohur Nobel të hotelit, 58-vjeçarja zbriti në rrugë dhe kaloi mbi barikadat metalike për të përqafuar mbështetësit që ishin mbledhur jashtë fasadës vezulluese të godinës së shekullit të 19-të në orët e para të së enjtes.

Më herët, të mërkurën, vajza 34-vjeçare e laureates së Nobelit, Ana Corina Sosa Machado, pranoi çmimin Nobel për Paqe në emër të së ëmës, pasi ajo nuk arriti të mbërrinte në Oslo me kohë për ceremoninë.

Kryetari i Komitetit të Nobelit, Jørgen Watne Frydnes, i kërkoi Nicolás Maduros të japë dorëheqjen, duke theksuar se ai humbi zgjedhjet ndaj Edmundo González, aleatit të María Corina Machado-s. Ai e vlerësoi Machado-n për përpjekjet për një tranzicion paqësor drejt demokracisë. Machado, e vonuar nga moti i keq gjatë arratisjes sekrete me anije drejt Curaçao-s, iu bashkua listës së laureatëve që s’kanë mundur të marrin çmimin për shkak të shtypjes politike, si Liu Xiaobo, Aung San Suu Kyi dhe Lech Wałęsa.

Regjimi i Maduros e sulmoi çmimin, me zëvendëspresidenten Delcy Rodríguez që e quajti ceremoninë “dështim” dhe çmimin “të njollosur me gjak”. Në një tubim, Maduro akuzoi administratën Trump për ndërhyrje dhe u bëri thirrje venezuelianëve të jenë gati “t’i thyejnë dhëmbët perandorisë amerikane”.

Megjithëse Machado shihet si një udhëheqëse e mundshme pas Maduros nëse Trump arrin ta rrëzojë atë, qëndrueshmëria e Maduros mbetet e fortë. Ai i mbijetoi edhe fushatës së presionit maksimal të vitit 2019, dhe analistët besojnë se mund të mbijetojë edhe valën e re të ndërhyrjes.