Pas gati dy dekadash në arrati, është arrestuar Besim Sherifi, i dyshuari kryesor për vrasjen katërfishe të anëtarëve të familjes Jusufi në fshatin Kopanicë të Shkupit, ngjarje e ndodhur më 5 tetor 2007.
Besim Sherifi, i cili për vite me radhë ishte i pakapshëm për organet e rendit dhe përmendej vazhdimisht në lidhje me këtë krim të rëndë, është lokalizuar dhe vënë në pranga pas hetimeve të gjata dhe bashkëpunimit ndërinstitucional.
Vrasja katërfishe ndodhi pas një konflikti të ashpër mes dy familjeve, i cili kishte nisur pasi një vajzë nga familja Jusufi ishte larguar dhe ishte strehuar tek familja Sherifi. Tensionet kulmuan me përplasje të armatosur pranë varrezave të fshatit, ku fillimisht u vra Zija Jusufi (32), ndërsa më pas, gjatë sulmit në një shtëpi, humbën jetën edhe tre persona të tjerë.
Për këtë ngjarje, më herët ishin dënuar me burgim të përjetshëm Sabri Sherifi dhe babai i tij Mitat Sherifi, ndërsa Fatmir Sherifi ishte dënuar me 10 vjet burg. Emri i Besim Sherifit kishte qarkulluar gjatë gjithë hetimeve, por ai nuk ishte përfshirë në aktakuzat për shkak të arratisë dhe pamundësisë për t’u arrestuar.
Me kapjen e tij, pritet që autoritetet të ndërmarrin veprimet e nevojshme ligjore për zbardhjen e plotë të rolit të tij në një nga krimet më të rënda që ka tronditur rajonin.
Burimi: alfax.mk
