5-vjetori i themelimit të Parkut Kombëtar Parku Kombëtar Mali Sharr është shënuar në Luginën e Leshnicës, një prej zonave më të pasura natyrore të rajonit dhe pjesë e rëndësishme e ekosistemit të mbrojtur të Sharrit.
Në këtë aktivitet mori pjesë edhe kryetari i Komunës së Tearcës, Daut Memishi, i cili vlerësoi rëndësinë e parkut si pasuri kombëtare dhe simbol të trashëgimisë natyrore.
Ai u shpreh se Parku Kombëtar “Mali Sharr” nuk është vetëm një zonë e mbrojtur, por një aset i rëndësishëm ekologjik dhe kulturor.
“Ky park është shumë më tepër se një zonë e mbrojtur, ai është një thesar i biodiversitetit, një simbol i trashëgimisë sonë natyrore dhe një pasuri që kemi detyrim ta ruajmë për brezat që vijnë”, deklaroi Memishi.
Ai përcolli gjithashtu urime për përvjetorin dhe mirënjohje për organizatorët dhe drejtuesit e parkut, duke veçuar drejtorin Elmazi dhe ekipin e tij për angazhimin e përditshëm në mbrojtjen dhe promovimin e zonës.
“Urime për këtë përvjetor dhe mirënjohje për organizimin e shkëlqyer, veçanërisht për drejtorin Elmazi dhe të gjithë ekipin e Parkut Kombëtar ‘Mali Sharr’, të cilët me përkushtim punojnë çdo ditë për mbrojtjen dhe promovimin e kësaj pasurie të çmuar”, shtoi ai.
Në përmbyllje të aktivitetit, u theksua nevoja për vazhdimin e bashkëpunimit institucional dhe ndërgjegjësimit publik për ruajtjen e biodiversitetit të Malit Sharr, i cili konsiderohet një nga zonat më të rëndësishme natyrore në vend.
Burimi: alfax.mk
