Kandidati i Aleancës Kombëtare për Integrim për Komunën e Çairit, Bujar Osmani, ka nis punën me arkitektin e njohur botëror, Michel Rojkind, ndërsa kanë shëtitur në Çarshinë e Shkupit, duke analizuar dhe diskutuar për, siç shkruan Osmani, vizionin e ardhshëm të territorit të Çairit.
“Sot me Michel Rojkind, një nga arkitektët më të njohur në botë, shëtitëm nëpër Çarshinë e Vjetër të Shkupit. E dëgjoja me vëmendje derisa i analizonte rrugët, hapësirën, njerëzit dhe e krijonte vizionin për Çairin. Në javët e kaluara, së bashku me të, punojmë mbi një vizion për rilindjen urbane të Çairit. Çairi më në fund do të marrë një plan afatgjatë për zhvillim dhe urbanizim. Në vizionin e ri, Çairi do të zhvillohet si një komunë moderne që i ka nevojat e qytetarëve, lirinë e lëvizjes dhe sigurinë e qytetarëve në qendër të strategjisë”, shkruan Osmani.
Michel, siç informon Osmani, tashmë i ka identifikuar pikat kyçe për përmirësim – hapësirën publike, qasjen, estetikën dhe funksionalitetin. “Në Çair nuk duhet më të shihet si një vend shembull për kaosin, mosfunksionalitetin dhe mos-punën. Për mua Çairi është shtëpia ime dhe si kryetar komune do ta investoj çdo atom energjie për ta ngritur nga hiri”.
