Ylli botëror Bad Bunny është rikthyer sërish në qendër të vëmendjes së mediave rozë, dhe këtë herë jo për muzikën e tij, por për jetën private.
Ditët e fundit po qarkullojnë kudo në rrjet disa pamje ku artisti shihet në shoqërinë e ish-partneres së tij historike, Gabriela Berlingeri, duke ndezur menjëherë thashethemet se dyshja mund t’i ketë dhënë një shans të dytë romancës së tyre.
Për të kuptuar peshën e këtij takimi, vlen të kujtojmë se historia e tyre nisi në prill të vitit 2017, kur u njohën në një restorant në Porto Riko, fill pas një koncerti të dyshes Zion & Lennox.
Në atë kohë, Benito sapo kishte nisur rrugëtimin drejt famës ndërkombëtare dhe Gabriela u bë një shtyllë shumë e fortë për të, duke e shoqëruar në prapaskena, në ngjarjet më të rëndësishme e madje edhe në tapetin e kuq të eventeve prestigjioze, ku parakaluan si çift zyrtar.
Ajo gjithashtu ka bashkëpunuar me të në projekte muzikore, si në këngët “En Casita” dhe “El Apagón”.
Megjithatë, përgjatë vitit 2022, raporti i tyre filloi të ftohej dhe erdhi ndarja e tyre e heshtur.
Ndonëse nuk pati ndonjë skandal publik, distanca dhe jeta e ngarkuar e artistit bënë të tyren.
Madje, në mesin e atij viti, Bad Bunny deklaroi në një video live në Instagram se Gabriela ishte thjesht shoqja e tij më e mirë dhe se që të dy ishin të lirë të dilnin me njerëz të tjerë, gjë që u vërtetua më vonë kur ai nisi romancën e bujshme me Kendall Jenner.
Por pas ndarjes nga modelja, rrugët e Benitos kanë çuar sërish te dizajnerja e bizhuterive.
Pamjet e tyre të fundit bashkë gjatë turneut të tij nëpër Evropë, përfshirë prezencën e saj në lojërat e Wimbledonit, i kanë habitur të gjithë.
Për më tepër, dyshja është fotografuar së fundmi në Stokholm, ku Benito dhe Gabriela shihen shumë të afërt me njëri-tjetrin, të përqafuar, ndërsa në një moment Benito shfaqet duke e puthur atë në kokë.
Ky afrim ka bërë që në rrjetet sociale të shpërthejnë komentet e shumta nga ndjekësit, të cilët po aludojnë se në fakt ata të dy nuk kanë qenë kurrë të ndarë dhe se çdo gjë tjetër ka qenë thjesht për syrin e mediave.
Nga ana tjetër, nuk përjashtohet mundësia që ky raport të mbetet thjesht shoqëror, pasi dyshja ka ruajtur gjithmonë një lidhje të shkëlqyer mbështetëse.
Edhe pse ende nuk ka një konfirmim zyrtar nëse janë sërish çift apo thjesht miq shumë të mirë, këto dalje të njëpasnjëshme kanë mjaftuar që të gjithë sytë e showbizit të kthehen sërish nga ata.
Burimi: botasot.info
