Sekretari i Përgjithshëm i Partisë Demokratike, Flamur Noka, i ftuar në emisionin “Studio24”, ka përsëritur qëndrimin lidhur me ish-deputetin Ervin Salianji, duke theksuar se ai nuk është më pjesë e strukturave të partisë, pavarësisht takimeve të njëpasnjëshme të zhvilluara nga ky i fundit në disa qytete të vendit.
Noka u shpreh se Salianji nuk ekziston më në qarqet drejtuese apo politike të Partisë Demokratike. “Zoti Salianji nuk ekziston në këto qarqe që flasim ne. Ai është ish-deputet, ish-aktivist i PD-së, në punë të vetë”, deklaroi ai.
Sipas Sekretarit të Përgjithshëm të PD-së, Salianji është i vetëpërjashtuar nga partia dhe nuk ka asnjë lidhje me të. “Ai mund të jetë në partinë tuaj, por jo në PD. E kemi deklaruar: ai është i vetëpërjashtuar nga PD, pasi ka bashkëpunuar me krimin”, tha Noka.
Ai shtoi se Partia Demokratike nuk dëshiron të përfshihet në debate që i cilësoi si të parëndësishme. “Mos na ngatërroni me çështje të vogla”, përfundoi Noka, duke nënvizuar se fokusi i opozitës mbetet te çështjet madhore që, sipas tij, shqetësojnë qytetarët dhe vendin.
Burimi: botasot.info
