Një këngë, një mesazh, një lidhje zemrash, Beyoncé falënderon Paul McCartney për “Blackbird”

Beyoncé shpreh mirënjohjen e saj ndaj familjes McCartney për këngën legjendare të Beatles, “Blackbird”

Ylli i muzikës pop, Beyoncé – aktualisht në turneun e saj ndërkombëtar Cowboy Carter – ka përfshirë këngën e famshme të vitit 1968 “Blackbird” në albumin e saj më të ri me të njëjtin emër, dhe e ka interpretuar atë gjatë performancave të saj live. Pas një serie koncertesh në stadiumin Tottenham Hotspur në Londër, Angli, Beyoncé i bëri një nderim të veçantë Paul McCartney-t, autorit të këngës, duke i shprehur falënderime në rrjetin e saj social Instagram.

“Faleminderit që shkruat njërën prej këngëve më të bukura të të gjitha kohërave,” shkroi Beyoncé në postimin e saj. “Sa herë që e këndoj, ndihem shumë e nderuar. Dhe është një moment i veçantë për mua të vesh një dizajn të vajzës suaj të bukur,” shtoi ajo, duke iu referuar Stella McCartney-t, stilistes së njohur dhe vajzës së Paul McCartney-t.

Në postim, Beyoncé ndau disa fotografi ku shfaqej me një kostum të dizenjuar nga Stella McCartney – një bluzë e bardhë me dy zogj të zinj të qëndisur në pjesën e bustit, si dhe një palë balluke me thekë të zbukuruara me gurë të çmuar.

Paul McCartney ka përgëzuar më herët versionin e Beyoncé-s të “Blackbird”, e cila në albumin Cowboy Carter paraqitet me një titull të modifikuar si “Blackbiird”, dhe përfshin vokalet e katër artisteve të reja me ngjyrë në zhanrin country: Tiera Kennedy, Tanner Adell, Brittney Spencer dhe Reyna Roberts.

“Besoj se ajo ka bërë një interpretim madhështor të kësaj kënge, dhe ai e thekson më tej mesazhin për të drejtat civile që më frymëzoi të shkruaj këngën në fillim,” kishte shkruar Paul McCartney në Instagram vitin e kaluar, duke i nxitur ndjekësit e tij: “Nëse nuk e keni dëgjuar ende, ju ftoj ta dëgjoni.”

McCartney shkroi “Blackbird” gjatë lëvizjes për të drejtat civile në SHBA në vitet 1960. Kënga ishte frymëzuar nga “Little Rock Nine”, grupi i studentëve me ngjyrë që ishin ndër të parët që sfiduan ndarjen racore në shkollat e Arkansas-it në fund të viteve ’50.

“Kur pashë pamjet në televizion në fillim të viteve ’60, ku vajza me ngjyrë largoheshin nga shkolla nën presion, isha i tronditur. Nuk mund ta besoja që ndodhte atëherë, dhe është e pabesueshme që akoma sot ka vende ku ndodhin gjëra të tilla,” shkroi ai në postim.

Ai përfundoi: “Çdo gjë që kënga ime dhe interpretimi i mrekullueshëm i Beyoncé-s mund të bëjnë për të lehtësuar tensionet racore, është një gjë e shkëlqyer dhe më mbush me krenari.”