Një 2-vjeçare arrestohet nga autoritetet federale të emigracionit, ‘shpërthejnë’ reagimet në SHBA

Incidenti, i ndodhur më 22 janar, ka ngjallur reagime të forta dhe debat rreth praktikave të zbatimit të ligjit të imigracionit.

Sipas dokumenteve gjyqësore dhe deklaratave të avokatëve të familjes, agjentët ndaluan pa një urdhër gjyqësor dhe më pas transportuan vajzën dhe babanë e saj në një qendër paraburgimi në Teksas, pavarësisht një urdhri emergjent të një gjyqtari federal për lirimin e vajzës dhe ndalimin e transferimit jashtë shtetit.

Avokatja e familjes, Irina Vaynerman, tha për gazetën The Guardian se familja kishte bërë apel dhe ishte kundërshtuar vendimi, duke theksuar se zyrtarët federalë kishin vendosur ata në një avion drejt Teksasit para se të zbatonin urdhrin e gjyqtarit. Sipas raportimeve, vajza u kthye më pas në Minnesota dhe iu dorëzua nënës së saj, ndërsa babai mbetet ende i ndaluar.

Incidenti vjen në mes të një valë kundërshtimesh ndaj masave të ICE në Minneapolis, përfshirë ndalimin e një djali 5-vjeçar disa ditë më parë, i cili u ndalua bashkë me babain e tij teksa po ktheheshin në shtëpi. Ajo ngjarje kishte shkaktuar zemërim të gjerë publik dhe debat rreth praktikave të zbatimit të ligjit të imigracionit.

Zyrtarët e Departamentit të Sigurisë Kombëtare kanë mbrojtur veprimet e tyre, duke pretenduar se babai kishte hyrë në mënyrë të paligjshme në vend dhe refuzuar urdhëresat e agjentëve, edhe pse avokatët e familjes e kundërshtojnë këtë version.

Ngjarjet kanë nxitur debate politike dhe protesta në komunitetet lokale, me organizata të të drejtave të njeriut që i quajnë këto praktika “shqetësuese” dhe “të dëmshme” për familjet e imigracionit, ndërsa mbështetës të zbatimit të ligjit nënvizojnë nevojën për kontroll më të rreptë të kufijve.

Në sfond të këtyre ngjarjeve, protestat në Minnesota vazhdojnë, duke reflektuar ndarjet e forta rreth politikave të emigracionit dhe mënyrës se si zyrtarët federalë po zbatojnë ligjet ndaj familjeve që jetojnë në komunitete amerikane.

Top Channel