Ka nisur edicioni i sivjetshëm i Universitetit Veror Ndërkombëtar të Prishtinës, ku gjatë dy javëve do të ofrohen 16 kurse të ligjëruara tërësisht në anglisht, e ku përfshihen fushat nga inteligjenca artificiale, teknologjitë financiare, lidershipi i brezit Z, drejtësia kalimtare, antropologjia, industritë e paideologjizuara, dhe shumë të tjera.
Rektori i Universitetit të Prishtinës, Arben Hajrullahu në hapjen e edicionit të sivjetshëm të Universitetit Veror Ndërkombëtar të Prishtinës, ka thënë se po marrin pjesë profesorë e studentë nga Japonia, Mbretëria e Bashkuar, Spanja, Gjermania, Turqia, Italia, Polonia dhe vende të tjera, duke theksuar se prania e tyre e bën komunitetin tonë shumë më të fortë.
Hajrullahu: Universiteti Veror është më shumë sesa një program akademik
“Universiteti Veror Ndërkombëtar i Prishtinës (PISU) është ambasadori ynë kryesor për hapjen ndërkombëtare. Prej gati një çerek shekulli, PISU ka ndërthurur studimet intensive me shkëmbimin e gjallë kulturor. Këtë verë, ofrojmë 16 kurse të ligjëruara tërësisht në anglisht, që përfshijnë fusha nga inteligjenca artificiale, teknologjitë financiare, lidershipi i brezit Z, drejtësia kalimtare, antropologjia, industritë e paideologjizuara, dhe shumë të tjera. Këto kurse pasqyrojnë përkushtimin tonë për të sjellë perspektiva globale në çdo cep të kampusit të Universitetit të Prishtinës. Por, PISU është më shumë sesa një program akademik. Është kohë për shkëmbim shoqëror, zbulim kulturor dhe miqësi të reja”, tha ai.
Ai tha se duke parë agjendën për dy javët në vijim ka ndjerë pak zili me mëngjese të mbushura me ide përparimtare dhe pasdite të kushtuara eksplorimit kulturor dhe mbrëmje të lira për të zbuluar kafenetë botërore të Prishtinës, ku mund të shijoni makiato dhe birra vendore, dhe të nisni biseda të gjalla me studentë e vendas njësojë.
Hajrullahu: Do t’i nisni mëngjeset me makiato më të mira
“Në fund të këtyre dy javëve, jam i sigurt që do t’i nisni mëngjeset me makiato më të mira, do të mësoheni me shtresat e pjatës tradicionale të flisë, dhe do të humbni veten në ritmin e skenës sonë muzikore lokale, nga tingujt urbanë bashkëkohorë deri te tingujt rrënqethës të çiftelisë, dhe do të kuptoni nderimin që kemi për simbolin e lashtë të Prishtinës, hyjneshën në fron. Në fund të këtyre dy javëve, jam i sigurt se do të bini nën magjinë e Kosovës, dhe ka mundësi që ajo t’ju thërrasë sërish për t’u kthyer”, tha ai.
Sipas tij, përmes këtij programi, e vendosim Prishtinën si një qendër të gjallë të shkëmbimit akademik, kërkimit kritik dhe jetës studentore të pasur, plotësisht në përputhje me standardet më të larta globale.
Burimi: botasot.info
