Nis ndërhyrja për prishjen e ndërtimeve pa leje në Vlorë

Në Vlorë nisi ndërhyrja për prishjen e ndërtimeve pa leje mbi kanalin e ujërave të larta, me qëllim evitimin e të gjitha problematikave që shkaktojnë përmbytje në qytet.

Kryebashkiakja e Vlorës, Brunilda Mersini, gjatë një inspektimi në kanalin e ujërave të larta, ka theksuar domosdoshmërinë e këtyre ndërhyrjeve për shkak të problematikave që lidhen me ndërtimet mbi kolektor.

Bashkia e Vlorës bëri të ditur se, puna do të vijojë me intensitet, me qëllim që dimrin e ardhshëm Vlora mos të përballet me situata të vështira si ajo e dy viteve më parë.

Mersini tha se puna ka nisur me pastrimin e kanalit të Naunkës, ndërsa në Karabash ka probleme sepse ka ndërtime e banesa mbi kolektor. Kryebashkiaktja tha për mediet se të prekurve nga këto ndërhyrje do t’u jepet bonus qiraje ose banesa sociale.