Në territorin e Komunës së Malishevës ka filluar fushata e korrje shirjeve të grurit, e cila po zhvillohet me rendimente të kënaqshme sipas të dhënave fillestare, kështu thonë nga Komuna e Malishevës.
Sipas njoftimit, këtë proces e ka ndjekur nga afër edhe kryetari i kësaj komune, Ekrem Kastrati, i cili është takuar me bujq dhe kombajnerë, duke i uruar për punën dhe duke i inkurajuar të vazhdojnë me kultivimin e grurit.
“Gruri është produkti më i begatë që jep toka jonë, dhe këtë e dëshmojnë edhe rendimentet e këtij viti, që po arrijnë mbi katër mijë kilogramë për hektar. I inkurajoj të gjithë bujqit që të mbjellin grurë, pasi përmes tij sigurojmë edhe bukën tonë të përditshme”, tha kryetari Kastrati gjatë vizitës në terren tek bujku Beqir Elshani në fshatin Banjë.
Edhe drejtori i Drejtorisë për Bujqësi, Pylltari dhe Zhvillim Rural, Sylë Dukolli, tha se rezultatet e para janë premtuese, me rendimente që sillen rreth 4,000 kilogramë për hektar, në varësi të kushteve të terrenit. Ai bëri të ditur se, sipas të dhënave nga aplikimet për subvencione, në territorin e Malishevës janë të mbjella mbi 4,000 hektarë me grurë.
Drejtori Dukolli njoftoi gjithashtu se është formuar Komisioni Komunal për përcjelljen e fushatës së korrje shirjeve, i cili do të jetë aktiv gjatë gjithë fushatës deri në përfundimin e saj.
Burimi: botasot.info
