Prokuroria Themelore në Prizren ka ngritur aktakuzë ndaj gjinekologut Sebajdin Gjini për kryerjen e veprës penale “Keqpërdorim i pozitës apo autoritetit zyrtar”.
Akuza ndaj Gjinit është ngritur pasi “Betimi për Drejtësi” më 23 mars 2024, kishte raportuar se si gjinekologu Gjini nuk ia kishte mundësuar kryerjen e lindjes së parakohshme me operim në Spitalin Publik të Prizrenit pacientes Geonita Zogaj.
“Sipas aktakuzës, me datë 31.01.2022 në Prizren, në kohë të pavërtetuar, duke shfrytëzuar detyrën apo autoritetin zyrtar – në cilësinë e mjekut pranë repartit të Gjinekologjisë – Obstetrike të Spitalit të Përgjithshëm të Prizrenit, nuk i përmbush detyrat zyrtare me qëllim që t’i mundësojë dobi pasurore vetes dhe personit tjetër dhe që t’i shkaktojë dëm pasuror personit tjetër, vepron në kundërshtim me Ligjin për Shëndetësi të Republikës së Kosovës, në atë mënyrë që refuzon ta pranojë kërkesën e pacientes G.B., ta kryejë lindjen me operim pranë Spitalit të Përgjitshëm të Prizrenit, me arsyetimin se pranë Repartit të Gjinekologjisë Obstetrike kishte pasur pacientë të infektuar me Covid-19 dhe i rekomandon të njejtës dhe bashkëshortit të saj, J.B., që lindjen me operim ta kryejnë në njërën prej klinikave private me seli në Prishtinë, në të cilën klinikë i pandehuri edhe është i angazhuar si mjek, pavarësisht se të gjitha kontrollet paraprake mjekësore pacientja në fjalë në vazhdimësi i ka kryer në Spitalin e Përgjithshëm të Prizrenit, nën kujdesin e të pandehurit si dhe në klinikën private të tij në Prizren, me ç’rast e njëjta detyrohet që lindjen ta kryejë pranë klinikës private në Prishtinë, të cilin operim e kryen vetë i pandehuri, duke i shkaktuar kështu dëm material të dëmtuarve G.B., dhe J.B., në shumën prej 1,500.00 € (njëmijë e pesëqind euro)”, thuhet në njoftimin e Prokurorisë.
Sipas pacientes dhe bashkëshortit të saj, gjinekologu Gjini që njëherësh ishte dhe shef i Repartit të Gjinekologjisë, i kishte referuar për në klinikën private.
Mirëpo, edhe përkundër lindjes në klinikë private, gjendja e foshnjës ishte përkeqësuar dhe ishte dërguar në QKUK.
Rrugës për në QKUK, babai i foshnjës Jetmir Bytyqi thotë ta ketë telefonuar gjinekologun Gjini, duke i kërkuar llogari se pse i referoi ta kryejnë lindjen në një klinikë private derisa foshnjën sërish po detyroheshin ta trajtonin në QKUK. Në audio-incizim, gjinekologu Gjini i jep të drejtë Bytyqit si prind, kur ky i fundit i thotë se nëse gjendja e bashkëshortes ka qenë e rëndë operacioni është dashur të bëhet menjëherë në Prizren.
“Gjini: Kur hinem na aty tham që gjendja e nanës nuk është mirë dhe sa më afër klinikës me kry këtë punë.
Bytyqi: Po sa më afër klinikës, a na klinikë të Gjinekologjisë në Prizren kem, ti the sa më afër pse se bone n’Prizren pra?
Gjini: Po tash me ardh prej Prizrenit e me qu atje e me malltretu e me kry.
Bytyqi: Doktor a ka qenë gjendja e nanës keq me tension?
Gjini: Po.
Bytyqi: D.m.th sipas teje më afër u kanë në Prishtinë me pru me bo operacion në ora 5, sesa që e ke pas në dorë në Repart të Gjinekologjisë kem në zyra tane, ti qaty pse se shtinë në sallë meniher me shti në operacion masi koka kanë keq gjendja e nanës te Geonita Zogaj.
Gjini: Nejse, nejse ki të drejtë”, kishin biseduar mes tjerash Gjini dhe Bytyqi në audio-incizim.
Pas raportimit të “Betimit për Drejtësi”, më 25 mars 2024 Spitali i Prizrenit e kishte liruar Gjinin nga detyra e u.d drejtorit të Repartit të Gjinekologjisë.
Lajmin për “Betimi për Drejtësi”, e kishte konfirmuar drejtohesha e Spitalit, Narziqe Hoxhaj.
“Është liru, se ka qenë ushtrues detyre doktori, është liru prej detyre”, ka thënë ajo.
Ndërsa në shtator të 2024-ës, “Betimi për Drejtësi” ka raportuar se si Gjini po hetohej për korrupsion. /BetimipërDrejtësi
Burimi: botasot.info
