Në Takimin e Liderëve të Ballkanit Perëndimor në Shkup, Kryeministri i Kosovës, Albin Kurti, ka falënderuar nikoqirin e samitit për mikpritjen dhe e ka përgëzuar për organizimin e suksesshëm, duke shprehur gjithashtu mirënjohje për zëvendëskryeministrin e Maqedonisë së Veriut, Izet Mexhiti, për pritjen në pikën e përbashkët të kalimit kufitar Hani i Elezit – Bllacë, një nga dy pikat e tilla të përbashkëta ndërmjet Kosovës dhe Maqedonisë së Veriut, si dhe për shoqërimin e tij.
Në këtë takim, Kurti ka vlerësuar progresin e Kosovës në kuadër të Planit të Rritjes së Bashkimit Evropian, duke rikonfirmuar përkushtimin e vendit ndaj reformave evropiane dhe bashkëpunimit rajonal, me theks se kërkesat për reforma duhet të shoqërohen me qasje të barabartë dhe financim të drejtë. Ai ka theksuar përparimin e arritur që nga takimi i fundit në Kotor, përfshirë zhbllokimin dhe kryesimin e CEFTA-s si dhe identifikimin e sektorëve strategjikë për investime në kuadër të nismës së re të BE-së “Autostrada e Tregut të Vetëm”, me fokus në teknologji, mbrojtje dhe bujqësi.
Kryeministri Kurti ka potencuar se siguria është parakusht për zhvillim, duke theksuar se rajoni nuk është i izoluar nga peizazhi gjeopolitik global. Ai ka mirëpritur veprimin e Shteteve të Bashkuara për të parandaluar Iranin nga pajisja me armë bërthamore dhe ka përshëndetur zotimin unanim të vendeve të NATO-s për të rritur shpenzimet për mbrojtje në 5% të Bruto Prodhimit Vendor, duke shtuar se një Evropë më e fortë është një Evropë që mund të mbrojë veten.
Në fund, Kurti ka shprehur se Kosova mbetet e përkushtuar për të vijuar me agjendën e reformave dhe për të ndërtuar partneritete të fuqishme për një të ardhme të sigurt dhe prosperuese në rajon dhe në Evropë.
