Në Gjykatën e Vlorës ka nisur sot në orën 09:30 seanca për caktimin e masës së sigurisë ndaj katër personave të arrestuar në Orikum, në kuadër të operacionit që çoi në kapjen e 42-vjeçarit Flodian Plaku, i cili prej rreth dy muajsh ishte në kërkim nga policia dhe fshihej në një hotel në këtë zonë.

Të ndaluarit janë:

Albano Lapshi, i dyshuar se i çonte ushqim Plakut në hotel;

Armando Dano, berber nga Shkodra, i njohur si “Berberi”, që shkonte për ta qethur Plakun;

Ligor Doko, pronar i hotelit ku qëndronte i fshehur Plaku;

Julian Aliaj, i kapur me armë zjarri me vete dhe i dënuar më parë për trafik droge.

Prokuroria ka paraqitur kërkesë për vendosjen e masave të sigurisë ndaj tyre, në kuadër të hetimeve për veprimtari të dyshuar kriminale në mbështetje të të shumëkërkuarit Flodian Plaku.

Sipas të dhënave nga hetimet, policia kishte vendosur prej javësh në ndjekje Plakun dhe kishte filluar të monitoronte edhe lëvizjet e personave që dyshohej se kishin kontakte me të. Pikërisht në ditën e ndërhyrjes, janë vëzhguar duke lëvizur drejt hotelit Albano Lapshi dhe Armando Dano, të cilët shërbenin për mbështetje logjistike.

Burimi: botasot.info