Shkup, 9 shtator – Në Kuvend deri më tani nuk ka arritur rezoluta për vijat e kuqe të cilën e paralajmëron kryetari i partisë opozitare maqedonase LSDM, Venko Filipçe. Kryetari i Kuvendit Afrim Gashi thotë se sapo ta marrin dokumentin, ai do t’u dërgohet deputetëve dhe do të përpunohet në përputhje me ligjet.

Lideri i LSDM-së, i cili sot është për vizitë në Francë, deklaroi se rezoluta është në fazat e saj përfundimtare dhe se do të ofrojë një mekanizëm kombëtar për përballje me kërkesat e mundshme shtesë nga ana e Bullgarisë.

“Në fazë përfundimtare është përgatitja e Rezolutës, e cila do të jetë zgjidhje vin-vin për vendin dhe qytetarët. Me këtë Rezolutë do të ofrojmë një mekanizëm kombëtar për përballje me kërkesat e mundshme joparimore nga Bullgaria gjatë negociatave nëse ato në ndonjë mënyrë nuk devijojnë nga Korniza negociuese”, tha Filipçe.

Kryeministri Hristijan Mickoski, ndërkohë, dje, në fjalimin e tij në ceremoninë qendrore me rastin e Ditës së Pavarësisë, tha se mezi pret të shohë propozimin e LSDM-së, duke theksuar se prioritet i Qeverisë është integrimi evropian, por ajo rrugë nuk duhet të jetë e turpshme, por dinjitoze.

“Po e pres me padurim atë propozim për të parë se si do të jetë. Jam në pritje, po e pres me padurim. Nga të njëjtët që pranuan një deklaratë për mosndryshim emri, dhe pastaj e ndryshuan, nga ata që bërtitën se nuk kishte ultimatume, dhe pastaj sollën propozimin francez, nga ata që thanë “le të bëjmë një referendum”, dhe pastaj nuk i njohën rezultatet e tij. Le të shohim se cilat janë ato vija të kuqe, ngjyra e të cilave do të jetë më e zbehtë se ngjyra më e bardhë, sepse nuk mund të flitet në të njëjtën kohë për vija të kuqe dhe të thuhet “gjithçka në tryezë duhet të pranohet, pa kushte”. Por ju them, jini të sigurt se për sa kohë që unë jam kryeministër, nuk do të ketë lojëra me çështje të tilla. Shteti do të jetë i sigurt”, tha ai.

Presidentja e vendit, Gordana Siljanovska-Davkova, deklaroi javën e kaluar se nuk ka nevojë për një deklaratë të re për vijat e kuqe të shtetit dhe u bëri thirrje të gjitha partive të bashkohen dhe të arrijnë një konsensus se si do të veprojnë jashtë vendit.

“Pas kaq shumë vijave të bardha, tani të flasësh për vija të kuqe është absurde. Ne kemi një deklaratë, dhe jo vetëm një, por disa deklarata që kemi miratuar në Kuvend dhe ato nuk u respektuan. Madje edhe rezultatin e referendumit nuk e respektuam, e lëre më vijat e kuqe. Nuk e kuptoj se çfarë do të thotë një vijë e kuqe në këtë drejtim, veçanërisht nuk e kuptoj argumentin se nëse fqinji ende përdor veton, ne do t’i pezullojmë negociatat, tha Siljanovska-Davkova në deklaratë për mediat të dhënë pas ndarjes së çmimit “Unaza Inxhinierike 2025”.

Burimi: zhurnal.mk