Gjatë 24 orëve të fundit në mbarë vendin janë detektuar 63 vatra zjarri, duke u bërë vendi i parë më i rrezikuar nga zjarret në rajon. Pjesa më e madhe e zjarreve aktive ishte në Shkup, Kriva Pallankë dhe Dojran. Për neutralizimin e tyre deri në orët e vona të mbrëmjes u angazhuan zjarrfikës, policë, ushtarë, vullnetarë dhe banorë lokalë. Drejtori për Mbrojtje dhe Shpëtim tha se janë ndërmarrë disa masa parandaluese.
“Janë shtuar kontrollet e policisë, duke përfshirë edhe policë civil nëpër vende ku ka rrezik për zjarre. Besoni se kjo po jep efektin e saj. Vetëm sot kushtet janë sikur dje, kemi erë të fortë, bari është i thatë edhe pse temperatura është më e ulët, por ja sot, deri tani numri i zjarreve është dukshëm më i ulët. Besoj se angazhimi parandalues i policisë, policisë pyjore dhe gjithë të tjerëve përmes lëvizjeve nëpër mal dhe alarmit për kujdes, po japin efektin parandalues”, deklaroi Stojançe Angellov, Drejtor për Mbrojtje dhe Shpëtim.
Angellov shtoi se ditëve në vijim, Njësia e Zjarrfikësve të Maqedonisë do të pajiset me mjete të reja, përkatësisht automjetet e ushtrisë dhe policisë do të adaptohen për luftë kundër zjarreve posaçërisht nëpër terrene të vështira.
“Pinzgauerët që i kemi janë 18 prej tyre, presim edhe 5 të bëhet gati, do të jenë një ndihmë e madhe për këtë verë. Zjarret këtë vit nisën më herët se kur e pritëm”, tha Stojançe Angellov, Drejtor për Mbrojtje dhe Shpëtim.
Në 24 orët e fundit linja emergjente 112 ka pranuar mbi 4 mijë thirrje. 18 persona kanë kërkuar ndihmë mjekësore për vështirësi në frymëmarrje shkaku i tymit, ndërsa 6 janë hospitalizuar. Për neutralizimin e zjarrit në Dojran, Greqia ka dërguar dy ekipe të zjarrfikësve. /Alsat.mk
Burimi: fol.mk
