Ndryshime në burgun e Drenovës pas kontrolleve në qelinë e Laert Haxhiut!

Emërohet drejtori i ri i burgut të Drenovës.

Emërimi vjen një ditë pas shkarkimi të drejtorit të burgut të Drenovës, Fatjon Fasho.

Burime për News 24 bëjnë me dije se  drejtori i ri është emëruar Lorent Nake.

Dje u shkarkua gjithashtu edhe shefi i policisë së IEVP Drenovë, i cili raportohet se është në ndjekje penale. Në vend të tij është emëruar Artan Koçibelli.

Shkarkimet vijnë vetëm pak ditë pas aksionit të kryer në burgun e Drenovës, ku u gjetën katër telefona celularë, të llojit iPhone.

Kujtojmë se javën e kaluar gjatë një kontrolli të ushtruar në burgun e Drenovës u kap me telefon celular Laert Haxhiun, një prej të dënuarve për krime të rënda, i njohur për përfshirjen në “Masakrën e Lushnjës”.

Kontrolli u krye pas një informacioni të siguruar nga Shërbimi i Kontrollit të Brendshëm dhe Antikorrupsion (SHKB), i cili sinjalizoi për praninë e një pajisjeje të paligjshme në qelinë e Haxhiut.

Gjykata e Posaçme e Shkallës së Parë e dënoi  Haxhiun me burgim të përjetshëm më 24 prill 2024 për “vrasje me paramendim”, “vrasje në rrethana cilësuese”, “gruppe kriminale”, dhe “armëmbajtje pa leje”.

Haxhiu u përfshi në atentatin ku u vranë dy persona (Zamir Latifi dhe Jurgen Hoxha), ndërsa u plagosën të tjerë, duke tentuar të vrisnin Xhulio Shkurtin, nipin e liderit të bandës së Lushnjës, Aldo Bare.