Ndahet nga jeta ish-bashkëpunëtori i afërt i Enver Hoxhës dhe Ramiz Alisë

Ndahet nga jeta në moshën 88-vjeçare në Durrës Muho Asllani, ish-funksionar i lartë i PPSH-së, i lindur në Bërdicë të Shkodrës ku mbaroi dhe arsimin bazë.

Në Shkodër mbaron teknikumin bujqësor dhe më pas ndjek Institutin Bujqësor që e mbaron në vitin 1964.

Në Kongresin e Gjashtë të PPSH-së, zgjidhet direkt anëtar i Komitetit Qendror të Partisë. Në janar 1974 u emërua sekretar i Parë i Komitetit të Partisë së rrethit të Matit dhe në korrik të po atij viti u emërua sekretar i Parë i rrethit të Kukësit.

Në maj të vitit 1976 u emërua zëvendësministër i Bujqësisë. Në mars 1979 emërohet sekretar i Parë i Komitetit të Partisë së Burrelit. Ka qenë sekretar i Parë në Shkodër. 

Në vitin 1981 bëhet anëtar i Byrosë Politike të Komitetit Qendror dhe emërohet sekretar i Parë në Durrës, detyrë nga e cila u shkarkua në vitin 1991.

Në Durrës gëzonte respektin e qytetarëve durrsakë për mënyrën e ushtrimit të funksionit dhe angazhimin në zgjidhjen e problematikave të banorëve, raporton Tch, përcjell KosovaPress.