Shqipëria do të ndikohet nga kushte atmosferike të qëndrueshme gjatë ditës së sotme.
Sipas parashikimit të Shërbimit Meteorologjik Ushtarak, moti do të jetë i kthjellët në të gjithë territorin, ndërsa nga mesdita deri në orët e pasdites parashikohen alternime vranësirash kalimtare të pakta deri mesatare, kryesisht në relievet malore në lindje të vendit.
Në këto zona, vranësirat do të shoqërohen me reshje të dobëta dhe të herëpashershme shiu, ndërsa në relievet më të larta priten shtrëngata afatshkurtra. Pas orëve të pasdites, moti rikthehet sërish i kthjellët në të gjithë territorin.
Era do të fryjë nga veriperëndimi dhe verilindja me shpejtësi mesatare prej 7 m/s, ndërsa në zonat luginore dhe përgjatë vijës bregdetare do të ketë intensifikime të përkohshme deri në 12 m/s.
Deti parashikohet i qetë, me valëzim të ulët, të forcës 1-2 ballë. SHMU këshillon ndjekjen e përditësimeve të vazhdueshme për informacion të saktë mbi kushtet meteorologjike.
Burimi: botasot.info
