Mjeku Gerald Kola: Stresi ndikon drejtpërdrejt në sistemin tretës – nuk luftohet, por menaxhohet

Mjeku gastro-intestinal Gerald Kola ishte sot i ftuar në emisionin “Koha për t’u zgjuar” në News24, ku foli për ndikimin e stresit në sistemin tretës dhe sjelljen tonë ndaj ushqimit.

“Stresi ka qenë dikur një reagim jetik për mbijetesë, por sot është kthyer në një stres të vazhdueshëm, shpeshherë patologjik, që ndikon negativisht në organizëm, veçanërisht në sistemin tretës”, u shpreh mjeku Kola.

Ai theksoi se stresi ndikon në mënyrën se si trupi jonë përpunon ndjesinë e urisë, duke krijuar çrregullime hormonale. “Sinjalet e para që çakordohen janë ato të stomakut. Nuk kemi mësuar të jetojmë me stresin – ai nuk luftohet, por menaxhohet”, shtoi ai.

Sipas Kolës, mënyra e të ushqyerit ndikon po ashtu në stres. “Ushqimin sot e shohim si kënaqësi, sepse na është marketuar si i tillë, por në të vërtetë është burim energjie. Kur shkojmë në resorte ‘all inclusive’, për shembull, njerëzit hanë vazhdimisht, gjë që kthehet në stres për organizmin”, tha ai.

Ai paralajmëroi gjithashtu për rrezikun që sjellin ushqimet e përziera, duke i cilësuar “armik të stomakut”, pasi pengojnë prodhimin e duhur të enzimave.