Shkup, 1 janar – Ministria e Punëve të Jashtme dhe Tregtisë së Jashtme informon se, pas tragjedisë që ndodhi në një bar në qendrën zvicerane të skijimit Crans-Montana, pas së cilës u aktivizua mekanizmi evropian për mbrojtje civile, ministri i Punëve të Jashtme dhe Tregtisë së Jashtme, Timço Mucunski, pas konsultimeve paraprake me kryeministrin Hristijan Mickoski dhe ministrin e Shëndetësisë Azir Aliu, zhvilloi një bisedë telefonike me ambasadorin e Zvicrës në vend, Christoph Sommer.

Gjatë bisedës, ministri Mucunski shprehu ngushëllime të sinqerta dhe të thella për familjet e viktimave, si dhe për popullin e Zvicrës, duke uruar shërim të shpejtë dhe të suksesshëm për të lënduarit.

Ai shprehu gatishmërinë e Republikës së Maqedonisë së Veriut për të pranuar pacientë të lënduar dhe për të siguruar ndihmë të përshtatshme mjekësore në institucionet shëndetësore të vendit.

Gjithashtu, ministri theksoi se, nëse ka nevojë, mjekë maqedonas – specialistë, të cilët ishin të përfshirë drejtpërdrejt në trajtimin e pacientëve pas tragjedisë në Koçan, janë të gatshëm të udhëtojnë menjëherë në Zvicër dhe të përfshihen në procesin e trajtimit të të lënduarve.