Me një mesazh të qartë për përgjegjësi, ligjshmëri dhe rezultate konkrete, sot ka nisur zyrtarisht mandati i Muhamet Hoxhës si Ministër i Ambientit Jetësor dhe Planifikimit Hapësinor. Hoxha vjen në këtë funksion si kuadër i Lëvizjes Demokratike, pjesë përbërëse e koalicionit qeverisës VLEN, duke shënuar një kapitull të ri në menaxhimin e politikave mjedisore në vend.
Në statusin e tij të parë në faqen zyrtare në facebook, Hoxha ka theksuar se drejtimi i këtij dikasteri përfaqëson një përgjegjësi të lartë shtetërore, por edhe një angazhim të palëkundur për shërbim profesional, me integritet dhe në funksion të interesit publik.
“Ambient i shëndetshëm nënkupton qytetarë të shëndetshëm”, ka shkruar Hoxha, duke e cilësuar mbrojtjen e mjedisit jetësor si çështje strategjike nacionale, të ndërlidhur drejtpërdrejt me shëndetin publik, zhvillimin e qëndrueshëm dhe cilësinë e jetës.
Sipas Hoxhës, fokusi kryesor i mandatit të tij do të jetë forcimi i politikave mjedisore, zbatimi rigoroz i ligjit dhe rritja e përgjegjshmërisë institucionale, pa kompromis.
Ministri i ri shprehu mirënjohje për besimin e dhënë, duke garantuar se ky besim do të shndërrohet në punë konkrete, vendime të bazuara në ligj dhe rezultate të matshme, në përputhje me vizionin qeverisës të koalicionit VLEN për reforma reale dhe transparencë.
