1
Shkup, 24 korrik – Garanci për departizimin dhe profesionalizimin e administratës publike, sipas ministrit të Administratës Publike Goran Minçev, është pakoja e ligjeve reformuese që tashmë janë miratuar, ndërsa deri në fund të vitit pritet të miratohen edhe tre ligje të reja.
Minçev sot paralajmëroi se në periudhën e ardhshme do të fillohet me debatet publike për pakon e re të ligjeve, përfshirë Ligjin për shërbimin e lartë udhëheqës dhe Ligjin për Pagat, të cilat duhet të miratohen deri në fund të këtij viti.
“Shpresoj se do t’i miratojmë deri më 31 dhjetor 2025, megjithëse procesi zgjedhor mund ta vonojë pak miratimin e këtyre ligjeve”, tha Minçev, duke iu përgjigjur pyetjeve të gazetarëve pas hapjes së Qendrës së rinovuar për trajnim të nëpunësve administrativ të Ministrisë së Administratës Publike.
Sipas Minçevit, ekziston një vullnet i fortë politik për ta bërë administratën publike jopartiake dhe profesionale, kurse treguesi më i mirë për këtë është pakoja e miratuar prej katër ligjesh.
“Para një periudhe të caktuar është miratuar një pako prej katër ligjesh reformuese që nuk ishin miratuar për 10 vjet. Këto ligje ishin pjesë e raportit të BE-së për pesë vjet si hapi i parë drejt reformave në administratën publike. Ky është një tregues i qartë se vetëm për një vit kjo Qeveri ka sjellë atë që nuk ishte miratuar për 10 vjet dhe po bën hapa thelbësorë në mënyrën e të menduarit se si duhet të duket administrata publike. Garancia për departizimin e administratës publike janë zgjidhjet e reja ligjore, pra rritja e kritereve që janë brenda kornizës së këtyre ligjeve për pjesëmarrje në shpalljet publike që do të shpallen nga institucionet në të ardhmen”, theksoi Minçev. l
Burimi: zhurnal.mk
