Kryeministri i Maqedonisë së Veriut, Hristijan Mickoski, ua mbylli gojën akuzuesve të BDI-së në Kuvend, duke thënë qartë se gjatë 15 muajve të qeverisjes aktuale nuk është zhvilluar asnjë takim për nismën famëkeqe “Open Balkan”.
“Gjatë mandatit tonë nuk ka pasur asnjë tryezë për ‘Open Balkan’. Përkundrazi, kemi mbajtur dy seanca të përbashkëta me Kosovën. Këto janë fakte që nuk manipulohen, sado që të përpiqet dikush t’i shtrembërojë,” tha Mickoski, duke shpërfaqur hipokrizinë e atyre që sot shfaqen si patriotë ndërsa dje ishin promotorët kryesorë të projektit pro-serb.
Mickoski kujtoi se VMRO-DPMNE ishte e vetmja që solli hapa konkretë në bashkëpunim me Kosovën, duke hapur dy vendkalime kufitare ekspres që u lehtësuan jetën qytetarëve.
“Ne i dhamë fund maltretimit në kufi, gjë që qeveritë e mëparshme, ku BDI ishte pjesë integrale nuk arritën as ta imagjinonin,” theksoi Mickoski.
