Mickoski: Maqedonia duhet të qëndrojë drejt, për të ardhmen e gjeneratave

3

Shkup, 6 dhjetor – Çdo lëvizje apo organizatë serioze duhet të ketë një bazë të fortë, kuadër të qartë dhe një udhërrëfyes që përcakton të ardhmen. Pluralizmi maqedonas solli shumë parti politike, por shumë prej tyre u zhdukën, disa ishin eksperimente, ndërsa të tjerat luftojnë për mbijetesë për shkak të vendimeve të gabuara dhe dobësive në lidership.

“Kur ka erëra të forta dhe stuhi, atëherë vërtet testohet forca e indit lidhës të një organizate – ideologjia e saj, bindjet dhe vullneti për sukses. Kur braktiset ideologjia humbet identiteti dhe lumturia kolektive zëvendësohet me interesa individuale”, theksoi lideri i VMRO-DPMNE-së, Hristijan Mickoski.

Ai shtoi se VMRO-DPMNE është një parti e madhe që mban mbi vete historinë, betejat dhe ëndrrat e shumë brezave.

“VMRO dhe Maqedonia kanë qenë bashkudhëtarë nëpër kohë. VMRO gjithmonë ka ekzistuar për një qëllim – Maqedoninë!”, tha Mickoski.

Sipas tij, shteti ndërtohet me karakter dhe vendime të guximshme, e jo me fjalë.

“E ardhmja nuk ndërtohet me fjalime të forta, por me vendime të guximshme. Sot flasim për rindërtimin e vetëbesimit maqedonas dhe rikthimin e ndjenjës se ky vend nuk është një eksperiment, por trashëgimi e gjeneratave që u sakrifikuan që ne të ekzistojmë”, u shpreh ai.

Mickoski nënvizoi se Maqedonia nuk duhet të jetojë në mbrojtje, por të qëndrojë drejt, me dinjitet dhe mendje të qartë.

“Përparimi nuk vjen nga ata që presin, por nga ata që nisin të krijojnë. As forcat e jashtme nuk do ta ndërtojnë shtetin tonë, as nuk do ta mbrojnë historinë tonë. Ky është obligimi ynë dhe misioni ynë gjeneracional”, tha lideri i VMRO-DPMNE-së.

Në kongres u prezantua edhe dokumenti i ri “Strategjia Maqedonia 2030”, i shoqëruar me një paradigmë të re, kod ideologjik të partisë dhe marrëveshje me qytetarët, që paraqet vizionin për të ardhmen e shtetit dhe të gjeneratave që vijnë.

“Ky kongres po zhvillohet pas fitores historike në zgjedhjet e fundit lokale. Fitoret na japin përgjegjësi për ta drejtuar shtetin, por edhe për të trasuar rrugën drejt së ardhmes. Populli ende jeton vështirë dhe me mundim, dhe ne duhet të sjellim shpresë dhe një të ardhme më të mirë”, tha Mickoski.