Kryeministri dhe kryetar i VMRO-DPMNE-së, Hristijan Mickoski, gjatë një vizite në komunën e Gazi Babës, tha se Qeveria ka investuar rreth 12 milionë euro në projekte që po transformojnë këtë komunë. Ai inspektoi disa prej tyre, përfshirë kënde lojërash dhe fusha sportive, një kopsht për fëmijë dhe një rrugë të rëndësishme për banorët.
Mickoski vlerësoi punën e kryetarit të komunës, Boban Stefkovski, duke theksuar se gjatë katër viteve të mandatit të tij, Gazi Baba ka kaluar nga stagnimi në zhvillim të dukshëm. “Janë realizuar dhjetëra e qindra projekte që i japin vlerë jetës së qytetarëve. Si Qeveri do të vazhdojmë të mbështesim projekte në të gjitha komunat, pa dallim përkatësie politike”, tha Mickoski, duke shtuar se investimet e deritanishme janë shembull i rrugës së ndërtimit dhe zhvillimit, ndryshe nga qeveritë e kaluara që, sipas tij, kanë stagnuar.
