Pas një rrugëtimi të gjatë, të ndershëm dhe të palodhur, kryetari i sapozgjedhur i Komunës së Çairit dhe lider i koalicionit qeverisës VLEN, Izet Mexhiti, ka shprehur mirënjohje dhe krenari për fitoren historike të arritur në Saraj, duke e cilësuar atë si triumf të bashkimit, besimit dhe punës së përbashkët.
“Pas një rrugëtimi të gjatë, të ndershëm e të palodhur, vjen koha ta festojmë fitoren bashkë! Saraji e dëshmoi edhe një herë se forca, bashkimi dhe përkushtimi i njerëzve të mirë, sjellin rezultate të mëdha,” ka shkruar Mexhiti.
Në mesazhin e tij, Mexhiti ka falënderuar me mirënjohje të thellë çdo aktivist, çdo anëtar të strukturave, çdo grua e burrë, çdo të ri e të re që qëndroi pranë ekipit të tij gjatë gjithë fushatës, duke theksuar se fitorja është rezultat i sakrificës dhe angazhimit të secilit prej tyre.
“Falemnderit secilit aktivist, çdo anëtari të strukturave tona, çdo grua e burri, për çdo të ri e të re që qëndroi me ne, që besoi, punoi e nuk u ndal asnjë ditë. Falemnderit për çdo orë pune, çdo hap, çdo fjalë dhe çdo përpjekje tuajën. Krenarë për ju, krenarë për Sarajin tonë!” ka shkruar Mexhiti.
Izet Mexhiti gjithashtu ka theksuar se kjo fitore nuk është vetëm një rezultat zgjedhor, por fillimi i një kapitulli të ri për Sarajin dhe qytetarët e tij, të cilët kanë zgjedhur të ecin drejt zhvillimit, dinjitetit dhe unitetit.
