Mbi 200 nga 700 dyqanet e Çarshisë së Vjetër janë ende në pronësi të ish ndërmarrjes për ndërtim dhe menaxhim me pronat dhe nuk funksionojnë siç duhet. Propozohet që këto t’i kalojnë sektorit privat për t’i bërë plotësisht funksionale të gjitha 700 dyqanet. Kështu është prehur në një intervistë ekskluzive për agjencinë shtetërore të lajmeve MIA, zëvendëskryeministri i parë Izet Mexhiti dhe njëherësh kandidat i VLEN-it për komunën e Çairit.
Mexhiti ka paralajmëruar projekte konkrete për vend parkime të reja, ku aktualisht janë siguruar 100 vende, kurse me projektin e Sheshit “Skënderbeu” do të shtohen edhe 400 të tjera, pra mbi 500 vende parkimi gjithsej që sipas tij do ta zgjidhin problemin më të madh të qasjes në Çarshi.
Në programin zgjedhor, Mexhiti premton se Çairi do të bëhet komuna e parë pa mbeturina, me të gjithë kontejnerët të vendosur nën tokë. Ai po ashtu njoftoi se nga 1 shtatori dy shkolla fillore, “Kongresi i Manastirit” dhe “Jashar Bej Shkupi”, do të funksionojnë në vetëm një ndërrim, ndërsa ky model do të zgjerohet edhe në shkolla të tjera me riorganizim dhe ndërtime të reja.
Në fushën e arsimit parashkollor, Mexhiti theksoi se është ndërtuar çerdhja më e madhe dhe më moderne në Çair, ndërsa dy të tjera të ngjashme do të ndërtohen së shpejti në lagje të tjera.
Burimi: MIA
