Kandidati për kryetar të komunës së Çairit, Izet Mexhiti vazhdoi sot takimet me qytetarët në kuadër të fushatës për zgjedhjet lokale, duke theksuar përkrahjen e fuqishme që po merr nga të gjitha lagjet dhe familjet shqiptare.
Kësaj radhe, Mexhiti ishte mysafir në konakun e familjes së nderuar të luftëtarëve Suat dhe Gani Bushi në lagjen Serovë, ku u prit me ngrohtësi dhe vendosmëri, duke marrë një mesazh të qartë: Çairi e di rrugën e fitores.
“Familja Bushi, me pritjen e tyre të ngrohtë dhe përkrahjen e vendosur, na dha një mesazh të fuqishëm: rruga e fitores kalon përmes përkrahjes së qytetarëve që e duan dhe e mbrojnë Çairin,” theksoi Mexhiti.
Ai u shpreh se Serova, një ndër bastionet e krenarisë shqiptare në Shkup, ka treguar edhe një herë se është në anën e duhur – në anën e zhvillimit, ndërtimit, drejtësisë dhe vizionit për të ardhmen.
“Çairi nuk ka kohë për eksperimente. Serova e di, Çairi e di – kush duhet të udhëheqë dhe kush është i përkushtuar për të çuar përpara këtë komunë krenare shqiptare,” shkruan në postimin e tij Mexhiti.
Duke vlerësuar përkrahjen që po merr nga çdo cep i komunës, ai tha se qytetarët tashmë janë bashkuar rreth vizionit të tij dhe të ekipit të tij, dhe se fitorja po formësohet përditë në zemrat dhe mendjet e njerëzve të zakonshëm që kërkojnë ndryshim dhe dinjitet.
“Përkrahja nga çdo lagje dhe çdo familje është një mesazh i fuqishëm se të gjithë po na bashkohen në rrugën e drejtë. Kjo është energjia që na jep Serova, kjo është fuqia që na jep Çairi,” shtoi ai.
