Zëvendëskryeministri i parë dhe kandidati i VLEN-it për kryetar të Komunës së Çairit, Izet Mexhiti, në një tubim me forumin e gruas, dërgoi një mesazh të qartë për barazinë gjinore, duke theksuar se demokracia është e pamundur pa pjesëmarrjen aktive të grave dhe vajzave. Ai nënvizoi se përjashtimi i grave nga politika është shkatërrim i themeleve të vetë demokracisë, ndërsa përfshirja e tyre është garancia e një shoqërie më të drejtë dhe më të fortë.
Mexhiti tha se barazia gjinore nuk është thjesht një kauzë e grave, por një kauzë e të gjithë shoqërisë.
“Kur vajzave u hiqen pengesat dhe u jepen mundësi të barabarta, fiton i gjithë komuniteti – shkollat bëhen më të forta, ekonomia më e gjallë dhe demokracia më e drejtë”, theksoi ai, duke shtuar se vizioni i tij për Çairin është komuna ku çdo zë dëgjohet dhe çdo qytetar ka vend në tavolinën e vendimmarrjes.
Duke e mbyllur fjalën, Mexhiti theksoi se pa gratë e vajzat çdo fitore është gjysmake, prandaj angazhimi i tij politik do të jetë i pandashëm nga angazhimi për barazi dhe drejtësi shoqërore.
