Qeveria ka miratuar Projektligjin e ri për lojërat e fatit, i cili sjell ndryshime thelbësore në një sektor që për vite me radhë ka funksionuar pa mbikëqyrje dhe kontroll të mjaftueshëm. Sipas zëvendëskryeministrit të parë, Izet Mexhiti, ky ligj përfaqëson një hap kyç në mbrojtjen e të rinjve dhe qytetarëve nga ndikimi i dëmshëm i lojërave të fatit.
Me zgjidhjet e reja ligjore, kazinotë, klubet e automatëve dhe bastoret sportive do të dislokohen larg institucioneve arsimore.
“Do ta pastrojmë ambientin përreth shkollave nga ndikimi i kësaj industrie destruktive. Nxënësit nuk do t’i nënshtrohen më kulturës së lojërave të fatit – të rinjtë do të mbrohen, siç e meritojnë,” theksoi Mexhiti.
Ligji parasheh rregulla më të ashpra, tatime më të larta dhe kushte të rrepta pune, me qëllim eliminimin e operatorëve që deri më tani kanë punuar në dëm të qytetarëve dhe institucioneve.
“I kemi dhënë fund kohës kur përfitimi nga lojërat e fatit ishte më i rëndësishëm se mirëqenia e qytetarëve. Ky është një ligj në interes të njeriut të zakonshëm – të nxënësit, të prindit, të familjes,” tha Mexhiti, duke shtuar se kjo Qeveri ka treguar se kur ka vullnet politik, ndryshimet janë të mundshme.
Ligji i ri do të hyjë në fuqi pas miratimit të tij në Kuvend.
