Zëvendëskryeministri i parë i Qeverisë së Maqedonisë së Veriut, Izet Mexhiti, ka përshëndetur arrestimin e njërit prej tifozëve përgjegjës për thirrjet fashiste dhe anti-shqiptare që u dëgjuan ditë më parë në Kumanovë, gjatë ndeshjes së basketbollit mes Maqedonisë së Veriut dhe Rumanisë.
“Përgëzoj institucionet për reagimin e shpejtë dhe punën efektive në këtë rast. Mesazhi është i qartë: gjuha e urrejtjes nuk do të tolerohet,” shkroi Mexhiti.
Ai shtoi se ky është një hap pozitiv në luftën kundër gjuhës së urrejtjes dhe theksoi rëndësinë e ruajtjes së kulturës sportive.
Mexhiti po ashtu uroi ekipin e Shkëndijës për ndeshjen e sotme kundër Qarabagut, duke ftuar tifozët që të tregojnë mbështetje me kulturë sportive dhe dinjitet kombëtar.
“E gjithë vëmendja jonë është te krenaria e futbollit, Shkëndija. Sonte, ta tregojmë atdhedashurinë me sjellje shembullore, jo me gjuhë urrejtjeje ndaj askujt,” theksoi ai.
