Kryetari i Komunës së Çairit, njëherësh edhe njëri nga liderët e koalicionit qeverisës VLEN, Izet Mexhiti, sot priti në kabinetin e tij delegacionin e Odës Ekonomike Maqedoni – Turqi (MATTO), të përbërë nga Fatih Shahbaz, Ajdovan Ademoski, Imer Selmani dhe Shahpaz Molaliev.
Takimi u zhvillua në atmosferë konstruktive dhe përfaqëson një hap të rëndësishëm drejt forcimit të bashkëpunimit ekonomik ndërmjet Komunës së Çairit dhe MATTO-s. Palët diskutuan mbi vizionin e përbashkët ekonomik, mundësitë për ndërmarrje të projekteve të reja, si dhe format e thellimit të partneritetit që sjellin vlera të drejtpërdrejta për komunën e Çairit dhe qytetarët.
Gjatë bashkëbisedimit u shkëmbyen ide dhe qëndrime rreth zhvillimit ekonomik dhe nxitjes së investimeve, forcimit të bashkëpunimit në fusha të ndryshme, mbështetjes infrastrukurrore dhe projekteve të përbashkëta në arsim e punësim, organizimin e eventeve tregtare dhe aktiviteteve që mundësojnë rrjetëzim më të fortë ndërmjet bizneseve.
Kryetari Mexhiti vlerësoi lartë angazhimin dhe gatishmërinë e MATTO-s për bashkëpunim, duke theksuar se Komuna e Çairit mbetet e hapur dhe e orientuar drejt iniciativave që sjellin zhvillim të qëndrueshëm, lëvizje ekonomike dhe perspektivë të re për qytetarët.
