Kandidati i VLEN-it për kryetar të Komunës së Çairit, Izet Mexhiti, hapi shtabin zgjedhor lokal në nëndegën “7 Marsi” në lagjen e tij, ku u prit nga një numër i madh qytetarësh.
Në fjalën e tij, Mexhiti e quajti tubimin një manifestim të fuqisë popullore. Ai theksoi se mbështetja e banorëve është energjia që do të shndërrohet në projekte konkrete për lagjet, shkollat dhe çerdhet e Çairit.
Duke kujtuar se dikur kjo lagje ishte vend ku laheshin kamionët e “Higjienës Komunale” që pastronin gjithë Shkupin dhe sot është lagje urbane me standarde, Mexhiti tha se i njëjti transformim mund dhe duhet të ndodhë në të gjithë Çairin. “Ne nuk vijmë me premtime boshe, por me projekte dhe ide të qarta,” theksoi ai.
Ai prezantoi projektet madhore të parapara për Çairin:
100 milionë euro investime të sigurua për zhvillim;
Kampusi i Universitetit “Nënë Tereza” me vlerë prej 40 milionë eurosh;
Sheshi Skënderbeu me parking nëntokësor prej 400 vendesh dhe investim prej 25 milionë eurosh;
Dy çerdhe të reja në Fushë Topanë dhe Çair të Vjetër me kapacitet për 1,000 fëmijë;
Dy shkolla të reja që do të mundësojnë mësim me një ndërrim dhe kushte më të mira për 8,500 nxënësit e Çairit;
Infrastrukturë të rregulluar për ujësjellës, kanalizim dhe rrjet atmosferik në lagjet e Çairit;
Pishina dhe salla sportive për të rinjtë, përfshirë edhe shndërrimin e bazenit të vjetër të papërdorur për 50 vite në një qendër të re sportive dhe muze të arritjeve të Çairit.
Mexhiti paralajmëroi gjithashtu 3,000 vendparkime të reja në komunë dhe investime të përbashkëta me Qytetin e Shkupit, mes tyre projekti prioritar prej 10 milionë eurosh për rrugën e Jahja Pashës, si dhe rregullimin e bulevardeve “Xhon Kenedi” dhe “Brigadës Maqedonase-Kosovare”.
“Kur është në pyetje Çairi, ne e lëmë Qeverinë, por edhe kur jemi në Qeveri nuk harrojmë që kemi ardhë prej Çairit, prandaj ato nuk mund të tregojnë për këto 8 vite sa ishin në Qeveri, dy zëvendëskryeministra edhe Artani edhe Bujari se çka bënë për Çairin përveç hapje të kazinove, të kredive të shpejta dhe korrupsionit të lartë.”
Burimi: alfax.mk
