Komuna e Çairit po finalizon përgatitjet për koncertin Gala të 28 Nëntorit, një ngjarje kulturore e nivelit të lartë që rikthen në Shkup divën botërore Inva Mula, së bashku me sopranon Dëshira Ahmeti Kërliu dhe tenorin e njohur Ismet Veseli. Ky kombinim artistësh të klasit të parë e pozicionon kryeqytetin si qendrën e skenës operistike shqiptare për festën më të rëndësishme kombëtare.
Kryetari Izet Mexhiti priti sot në Komunën e Çairit sopranon Dëshira Ahmeti Kërliu, me të cilën u diskutuan detajet e koncertit që pritet të sjellë një atmosferë të veçantë feste, duke promovuar kulturën shqiptare përmes artit dhe zërit operistik.
Me mbështetjen e plotë të Komunës së Çairit, kjo mbrëmje gala synon të bashkojë qytetarët dhe të nderojë 28 Nëntorin me interpretimet më prestigjioze të skenës muzikore shqiptare.
