Zëvendëskryeministri i parë dhe ministër i Ambientit Jetësor dhe Planifikimit Hapësinor, Izet Mexhiti, ka zhvilluar sot një takim të rëndësishëm me ambasadoren amerikane, znj. Angela Ageler, ku në fokus ishte ruajtja dhe zhvillimi i qëndrueshëm i Liqenit të Ohrit, një prej pasurive më të çmuara të vendit dhe rajonit.

Mexhiti dhe ambasadorja Ageler diskutuan mbi përmirësimin e cilësisë së ujit, menaxhimin e peshkimit, zhvillimin e turizmit dhe hapat konkret të propozuar nga ekspertët amerikanë, si forcimi i Institutit Hidrobiologjik, monitorimi limnologjik dhe mbrojtja e troftës së Ohrit. Në takim mori pjesë edhe profesori i njohur amerikan, Jason Stockwell, i cili së shpejti do të vizitojë Ohrin për të ndarë ide mbi bashkëpunimin shkencor dhe institucional.

“Ruajtja e Liqenit të Ohrit është prioritet kombëtar dhe ndërkufitar. Partneriteti me Shtetet e Bashkuara na jep garanci të forta për sukses në mbrojtjen e kësaj trashëgimie natyrore dhe kulturore,” ka thënë Mexhiti, duke nënvizuar se miqësia me SHBA-të është garanci për të ardhmen ekologjike dhe të sigurt të vendit.