Në kuadër të shënimit të 3 Dhjetorit, Ditës së Personave me Aftësi të Ndryshme, Komuna e Çairit ka dhënë një mesazh të fuqishëm për përfshirje dhe barazi. Kryetari i Komunës së Çairit dhe një nga liderët e koalicionit qeverisës VLEN, Izet Mexhiti, mori pjesë në inaugurimin e organizatës së re “INKLUDIVERSA”, një nismë që synon të krijojë hapësira më të qasshme dhe më mbështetëse për çdo qytetar.
“Me shumë respekt dhe mbështetje mora pjesë edhe në inaugurimin e organizatës “INKLUDIVERSA”, një nismë e rëndësishme që synon krijimin e hapësirave më të qasshme dhe mbështetëse për çdo qytetar”, ka theksuar Mexhiti.
Mexhiti gjithashtu ka nënvizuar rëndësinë e kësaj date, duke kujtuar se përfshirja dhe fuqizimi i personave me nevoja të veçanta është obligim i mbarë shoqërisë.
“Secili qytetar meriton respekt, mundësi të barabarta dhe mbështetje për të zhvilluar potencialin e tij të plotë”, deklaroi Mexhiti, duke shtuar se kjo është rruga drejt një shoqëria më të drejtë dhe më human.
Komuna e Çairit, sipas kreut të saj, punon çdo ditë për të ndërtuar një mjedis tërësisht gjithëpërfshirës.
“Fëmijët dhe të rinjtë me aftësi ndryshe duhet të gjejnë mbështetje, kujdes dhe mundësi reale për t’u integruar në të gjitha sferat e jetës”, ka thënë Mexhiti.
Ky angazhim, siç potencoi kryetari i Çairit, Izet Mexhiti, është pjesë thelbësore e vizionit të Çairit për një komunë moderne, të barabartë dhe të hapur për të gjithë, një model i përparimit social në vend.
