Kandidati i koalicionit qeverisës VLEN për kryetar të komunës së Çairit, Izet Mexhiti, ka reaguar ashpër ndaj deklaratës së Bujar Osmanit, kandidatit të Aleancës Kombëtare për Integrim, i cili tentoi të shmangë përgjegjësinë për rastin famëkeq “Monstra” me arsyetimin se gjatë asaj periudhe ka qenë “një mjek i thjeshtë”.
I pyetur nga gazetarët për këtë deklaratë, Mexhiti e ka goditur Osmanin me një kundërpërgjigje të shkurtër.
“Nëse ka qenë mjek, atëherë pse është marrë me rastin Monstra? Nëse ka qenë mjek i thjeshtë, pse ai ka qenë figura politike më e eksponuar në atë rast?”, ka deklaruar Mexhiti.
Sipas Mexhitit, kjo është edhe një provë më shumë e hipokrizisë dhe manipulimit politik që për vite me radhë ka karakterizuar funksionimin e strukturave të BDI-së, ndërsa qytetarët tashmë janë të lodhur nga mashtrimet dhe justifikimet e tilla.
Mexhiti gjithashtu ka thënë se rasti “Monstra” është goditje e drejtpërdrejt për Bujar Osmanin edhe atë në pikën më të ndjeshme të tij, një plagë e hapur për shoqërinë shqiptare që, sipas Mexhitit, nuk do të shërohet me gënjeshtra dhe deklarata të turpshme të tipit “kam qenë mjek”.
