Zëvendëskryeministri i parë dhe njëherësh kandidat i VLEN-it për kryetar të Komunës së Çairit, Izet Mexhiti, ka reaguar ashpër ndaj kundër kandidatit të tij nga radhët e BDI-së, Bujar Osmani. Në një deklaratë për media, Mexhiti e ka quajtur Osmanin njeri që në çdo institucion ka lënë pas vetëm epitete negative dhe hije skandalesh.

“Tek spitali i Çairit, tek spitali gjinekologjik “Nënë Tereza”, Bujar Osmani ka marrë epitetin PACIENTI. Edhe sot ai mundohet t’i mohojë të gjitha, por faktet flasin vetë. Raporti i Entit Shtetëror për Revizion ka konstatuar keqpërdorime të rënda gjatë organizimit të Samitit dyditor të OSBE-së, ku janë shpenzuar plot 2 milionë euro. 200 denarë për metër katror për kositje bari, apo 7 mijë euro për zëvendësim tubacionesh, janë shifra që tregojnë qartë zhvatjen marramendëse”, theksoi Mexhiti.

Mexhiti ka paralajmëruar qytetarët e Çairit se nëse një person i tillë do të vinte në krye të komunës, buxheti i saj do të “zhdukej për një javë” dhe do të rrezikoheshin edhe pagat e arsimtarëve.

“Çairi ka nevojë për menaxhim vizionar, jo për PACIENTË politikë që dinë vetëm të harxhojnë dhe të zhvatin. Përgjigjen për këtë, Bujari do ta marrë nga vetë qytetarët e Çairit më 15 tetor”, ka përfunduar Mexhiti.