Zëvendëskryeministri i parë dhe njëherësh kandidati i koalicionit qeverisës VLEN për kryetar të komunës së Çairit, Izet Mexhiti, ka akuzuar kundër kandidatin e tij nga BDI-ja, Bujar Osmanin, duke e quajtur politikan të salloneve që nuk ka as vizion e as guxim për të udhëhequr Çairin.
Mexhiti theksoi se Osmani mbështetet verbërisht tek porositë e ardhura nga zyrtarë ndërkombëtarë të njohur si kundërshtarë të pavarësisë së Kosovës, siç është Josep Borrell, ish ministër i Jashtëm i Spanjës dhe Miroslav Lajçak.
“Duke mos pasur ide e projekt për Çairin, Bujari gjithmonë fshihet pas mesazheve që i vijnë nga Borelli e Lajçaku. Ju e dini që edhe në të kaluarën ka pasur disa porosi të koduara që vetëm ai i dinte, por kurrë nuk i tregoi,” është shprehur Mexhiti.
Kandidati i VLEN-it shtoi se fushata e BDI-së nuk është asgjë tjetër veçse një mashtrim i organizuar me anketa të rrejshme dhe propagandë boshe. Sipas Mexhitit ata janë mësuar me FAKE fushata, me lojëra të pista dhe me mashtrime, sepse nuk kanë çfarë t’i ofrojnë qytetarëve të Çairit. Qytetarët meritojnë vizion, zhvillim dhe projekte konkrete, jo porosi të importuara nga armiqtë e pavarësisë së Kosovës.
